TINULIGSA nitong Miyerkules ni dating senador at ngayon ay Mamamayang Liberal Party-list Rep. Leila de Lima ang Embahada ng Tsina sa Maynila dahil sa tinawag niyang “Orwellian doublespeak,” at binalaan ang mga Pilipino na mag-ingat sa mga pahayag na nagkukubli ng pananakot bilang diplomasya sa West Philippine Sea (WPS).

“Mag-ingat sa taong nagsasalita nang may dalawang dila,” isinulat ni De Lima sa X, bilang reaksyon sa pahayag noong Enero 13 ng Deputy Spokesperson ng Embahada ng Tsina sa Pilipinas na pumupuna at tumatanggi sa mga kamakailang pahayag ng Philippine National Maritime Council tungkol sa WPS.

Iginiit ng embahada na “nilabo” umano ng Pilipinas ang pagkakaiba ng territorial seas at exclusive economic zones (EEZs), at inakusahan ang Maynila ng serye ng mga hakbang na umano’y “nagpasiklab ng tensyon” sa mga katubigang inaangkin ng dalawang bansa bilang bahagi ng kani-kanilang EEZ—binanggit pa ang mga insidenteng mula pa sa pagkalaylay ng BRP Sierra Madre sa Ayungin Shoal.

Pinuntirya rin nito ang mga opisyal ng Pilipinas, kabilang si Philippine Coast Guard (PCG) spokesperson Jay Tarriela, at inakusahan silang nagpapalaganap ng mga “baluktot, mapanlinlang, at mapanulsol na mga naratibo” na umano’y nagtutulak sa Pilipinas sa alitan laban sa tinawag ng pahayag na “kaibigan” nitong Tsina.

“Lahat ng ito ay Orwellian doublespeak,” sabi ni De Lima.

Binigyang-diin niya na walang ligal na batayan ang pag-angkin ng Tsina ng magkakapatong na EEZ sa Pilipinas.

Aniya, humigit-kumulang 900 kilometro ang layo ng Tsina sa Pilipinas sa pinakamalapit na punto sa pagitan ng Hainan at Palawan.

“Kung kakalkulahin ang 300-kilometrong EEZ para sa bawat bansa mula sa kani-kanilang baselines, may matitira pa ring maayos na 300-kilometrong buffer zone sa pagitan nila,” paliwanag ni De Lima.

Sa pinakapuso ng sigalot, dagdag niya, ay ang nine-dash line claim ng Tsina—na inilarawan niyang lantad na pagbalewala sa pandaigdigang batas.

“Walang mas nakalalabo sa pagkakaiba ng territorial sea at EEZ kundi ang katawa-tawa at pambatang fairy tale ng nine-dash line ng Tsina na, nakapagtataka, patuloy pa rin nitong ginagamit sa mga seryosong pandaigdigang legal na forum,” aniya.

Inakusahan din ni De Lima ang Beijing ng “piling amnesia,” at sinabing sadyang hindi binanggit ng pahayag ng embahada ang sariling mga kilos ng Tsina sa Spratly Islands at Scarborough Shoal, kabilang ang malawakang pagtatayo ng mga isla at agresibong mga maniobra laban sa mga mangingisdang Pilipino at mga tauhan ng PCG.

“Hindî kasalanan ng Pilipinas kapag binabangga ng mga Tsino ang sarili nilang mga barko habang hinahabol ang mga sasakyang-dagat ng PCG,” sabi niya, at idinagdag na may pitong military outposts na ngayon ang Tsina sa Spratlys—ang pinakamarami sa mga bansang nag-aangkin.

Nagbabala si De Lima na ang tiyempo at tono ng pahayag ng embahada ay dapat ikabahala ng mga Pilipino at ng kanilang mga pinuno, lalo na sa gitna ng tumitinding pandaigdigang tensyon at tunggalian ng kapangyarihan.

“Sinasabi ng Tsina na ang pagtatanggol sa kung ano ang nararapat na atin sa ilalim ng pandaigdigang batas ay hindi raw para sa ating kapakinabangan dahil inaalisan tayo nito ng kanilang pagkakaibigan,” ani De Lima. “Siyempre, hindi pagkakaibigan ang iniaalok ng Tsina—hinihingi nila ang pagsuko.”

“Hindî nila tayo hinihiling na maging kaibigan. Hinihiling nilang maging basalyo ang Pilipinas,” dagdag pa niya.

Tinapos niya ang kanyang pahayag sa isang matinding batikos, sinabing kung magpapatuloy ang Embahada ng Tsina sa pagpapakalat ng tinawag niyang mga maling naratibo at sa pagtuturo sa mga opisyal ng Pilipinas na ginagampanan lamang ang kanilang tungkulin, “mas mabuti pang itigil na nito ang pagpapanggap na isang diplomatikong misyon at gawin na lamang ang sarili bilang isa pang Chinese troll farm.”