HUMILING ang Department of Public Works and Highways (DPWH) sa Department of Justice (DOJ) na maglabas ng immigration lookout bulletin order (ILBO) laban sa 25 kontratista at opisyal ng gobyerno na sinasabing may kinalaman sa mga kuwestiyonableng proyekto sa flood control.

Sa isang liham na ipinadala kay Justice Secretary Crispin Remulla, hiniling ni DPWH Secretary Vince Dizon sa DOJ na bantayan ang mga indibidwal na ito, kabilang sina Cezarah at Pacifico Discaya, na presidente at authorized managing officer, ayon sa pagkakasunod-sunod, ng Alpha & Omega General Contractor and Development Corp., at Lawrence Lubiano, presidente ng Centerways Construction and Development Inc.

“Isang imbestigasyon ang isinasagawa sa ilang opisyal ng DPWH at mga pangunahing opisyal ng mga construction company na diumano’y sangkot sa mga ‘ghost projects’ at substandard na konstruksyon ng mga proyekto sa flood control,” sabi ni Dizon. “Ang napapanahong pagpapalabas ng ILBO ay lubhang mahalaga upang makatulong sa mga kasalukuyang imbestigasyon na magpatuloy nang walang pagkaantala at mapanagot ang mga may sala sa mamamayang Pilipino.”

Ang isang ILBO ay para lamang sa pagmamanman, at hindi sapat upang ipagbawal ang pag-alis ng mga indibidwal mula sa Pilipinas.

Kapag nakita, ang mga immigration officer ay inutusang agarang ipaalam sa DOJ at sa Kamara de Representantes ang anumang impormasyon tungkol sa paglalakbay ng mga ito, at tingnan kung may mga bagong order laban sa kanila.

Gayundin, hiniling ng pinuno ng DPWH sa Bureau of Immigration (BI) na ipaalam ang kanilang ahensya tungkol sa mga plano sa paglalakbay ng mga indibidwal na ito.

“Bilang karagdagan sa pagpapalabas ng ILBO, maaari rin po kaming humiling na utusan ang Bureau of Immigration na agad ipaalam sa DPWH at iba pang ahensya na nagpapatupad ng batas ang anumang impormasyon tungkol sa nalalapit na paglalakbay ng mga indibidwal na ito,” dagdag niya. Philippine News Agency