MAHAL na Martes ang sasalubong sa mga motorista dahil tataas ang presyo ng gasolina ng P1.90 kada litro, P1.20 sa diesel at P1 sa kerosene simula alas-6:01 ng umaga.

Ito ang tiniyak ng Petron Corporation, Pilipinas Shell, Chevron Philippines, Seaoil Philippines at Flying V base sa abiso sa publiko.

Ganito rin ang lakas ng sirit ng presyo ng PTT Philippines, Total Philippines, Phoenix Petroleum, Unioil Philippines at Petro Gazz.

Alas-4:01 ng hapon naman ang simula ng price increase ng Clean Fuel.

Nauna ng nagbabala noong nakaraang linggo ang Department of Energy-Oil Industry Management Bureau (DOE-OIMB) ng malakihang taas presyo ng langis dahil sa ginawang sanction ni US President Donald Trump sa langis ng Russia at Iran.