KINUWESTIYON ni Senator-Judge Risa Hontiveros kung paano maaaring nakadagdag sa income ni Vice President Sara Duterte ang mga idineklarang business interests matapos sabihin ng testigo mula sa Securities and Exchange Commission na walang dividend income na manggagaling sa isang investment kung walang dividend na idineklara.

Sinabi ni SEC Company Registration and Monitoring Department Director Gerardo Fernando Del Rosario na kung walang declared dividends, walang dagdag na income mula sa naturang investment ng stockholder.

Lumutang ang usapin habang inihaharap ng House prosecution ang corporate records ng mga kumpanyang iniugnay kina Duterte at asawang si Atty. Manases Carpio bilang bahagi ng Article II ng impeachment case.

Ginagamit ang SEC records upang tukuyin ang ownership, stockholdings at financial interests ng mag-asawa at alamin kung ang mga negosyong idineklara ni Duterte ay nagbigay ng income na maaaring makatulong magpaliwanag sa pagbabago ng kanyang idineklarang net worth.

Sinabi ni private prosecutor Erwin Matib na batay sa corporate records na iniharap, walang idineklarang dividends para kina Duterte at Carpio mula sa mga kumpanyang sakop ng presentasyon ng prosecution.

Kabilang sa mga records na ipinakita ang Davao Emerging Taipans Corp., Three Kids Trucking Services Inc., CYK&T Davao Corp. at SGT Fortune Horse Corp., na may no-dividend entries sa iba’t-ibang panahon.

Dito nakatuon ang tanong ni Hontiveros: Kung walang dividend na idineklara, may income bang nagmula mismo sa naturang investment?

Ang sagot ni Del Rosario ay tumutukoy sa dividend income. Ang kawalan ng dividend declaration ay hindi nangangahulugang walang sales, profits, assets o business activity ang isang kumpanya.

Hindi rin nito awtomatikong pinatutunayang walang ibang lehitimong pinagkukunan ng personal income ang isang stockholder.

Maaaring kumita ang isang korporasyon at panatilihin ang profits sa negosyo sa halip na ipamahagi ang mga ito bilang dividends sa stockholders.

Naunang iniharap ng prosecution ang mga Statements of Assets, Liabilities and Net Worth ni Duterte upang ihambing ang kanyang declared assets, liabilities, business interests at financial connections sa corporate records at iba pang dokumento.

Batay sa Article II, inaakusahan si Duterte ng umano’y kabiguang ganap at tapat na ideklara ang assets, liabilities at net worth nila ng kanyang asawa at ng hindi pag-divest sa kanyang business interests habang Vice President mula 2022 hanggang 2025.

Nakasaad din sa Article II at sa SEC records na ginamit ng prosecution na ang pangalang Sara Z. Duterte ay nakalista bilang direktor at minority stockholder ng Metro City Chow Foods Corp. mula 2022 hanggang 2025, na may 500 shares o 20 porsiyentong ownership.

Nauna namang sinabi ni Del Rosario na ipinagbabawal ng Article VII, Section 13 ng Constitution sa Vice President ang direktang o hindi direktang pakikilahok sa negosyo habang nanunungkulan.

Kinakatawan si Duterte ng kanyang mga abogado sa impeachment proceedings at kinokontra ng depensa ang mga alegasyon sa Articles of Impeachment.

Nananatiling tungkulin ng prosecution na patunayan kung sinusuportahan ng corporate records, dividend history at iba pang financial evidence ang Article II allegations, habang may pagkakataon ang depensa na kuwestiyunin ang ebidensya at interpretasyon ng prosecution.