UMUSAD na ang konstruksyon ng double track, electrified train system na may biyaheng Alabang-Calamba, Laguna.

Isang ground breaking ceremony ang isinagawa ng Department of Transportation (DOTr), katuwang ang Philippine National Railways (PNR) para sa civil works contract packages ng naturang ruta na bahagi ng North-South Commuter Railways (NSCR) ngayong araw, Hulyo 3, 2023.

“Residents and communities who have noticed the railway’s massive construction have pinned their hopes on a comfortable, affordable, safe and efficient commute – a striking contrast to the deteriorating road traffic that has spilled over to north and south of Metro Manila,” ani DOTr Sec. Jaime Bautista.

Ang electrified train ay mayroong mga elevated station sa Alabang, Muntinlupa; San Pedro, Pacita, Biñan, Santa Rosa, Cabuyao, Banlic, at Calamba sa Laguna.

Nagpasalamat si Secretary Bautista sa mga naging katuwang ng DOTr sa proyekto gaya ng Japan, South Korea, Asian Development Bank (ADB), at mga lokal na pamahalaan.

“I would like to express the sincerest gratitude of the DOTr to ADB, the embassies of South Korea and Japan, the Japan International Cooperation Agency, the Hyundai – DongAh joint venture as contractor and the local government of Santa Rosa for their respective collaborative efforts that enabled us to begin construction of these last three segments of the NSCR,” sabi ni Sec. Bautista.

Kapag natapos na ang 147-km NSCR System, inaasahang magiging dalawang oras na lamang ang biyahe mula at patungong Clark, Pampanga at Calamba, Laguna, mula sa kasalukuyang 4 – 4.5 oras.

Layunin din ng proyektong makatulong sa pagpapalakas ng ekonomiya, sa pamamagitan ng pagbubukas ng maraming oportunidad at trabaho para sa lahat.