IPINAHAYAG ni bagong talagang Department of Public Works and Highways (DPWH) Secretary Vince Dizon na kanyang bubuwagin ang special unit na binuo ng dating kalihim na si Manny Bonoan upang imbestigahan ang top 15 contractors na tinukoy ni Pangulong Ferdinand “Bongbong” Marcos Jr.

Sa panayam sa programang Ted Failon and DJ Chacha sa True FM, binigyang-diin ni Dizon na hindi tama para sa ahensya na sila mismo ang magsagawa ng sariling imbestigasyon.

“Hindi po ako sang-ayon sa ahensyang nag-iimbestiga sa sarili niya,” ayon kay Dizon. “We cannot investigate ourselves. Yun nga po ang kagandahan ng independent commission na itatayo ng ating Pangulo. Lahat ng impormasyon na makakalap ng bagong team, ipapasa po sa independent commission.”