BUMISITA at nagpaalam si Konsul Heneral Senen T. Mangalile kay Alkalde James Solomon ng Jersey City noong Martes, 11 Agosto, upang ipaabot ang kanyang pagpapahalaga sa walang sawang suporta ng lungsod sa komunidad ng mga Pilipino-Amerikano.

Pinasalamatan ni Mangalile ang pamahalaang lungsod sa pagtataguyod nito sa kulturang Pilipino, pakikilahok sa mga sibikong gawain, at pagpapalakas sa ugnayan ng dalawang panig.

Binigyang-diin ng dalawang opisyal ang kahalagahan ng patuloy na kolaborasyon sa pagitan ng konsulado, lokal na pamahalaan, at ng Fil-Am community.

Ang Jersey City ay tahanan ng humigit-kumulang 16,800 na Pilipino at Pilipino-Amerikano.

Kabilang sa mga simbolo ng matatag na ugnayang ito ang estatwa ng Pambansang Bayani na si Dr. Jose P. Rizal sa lungsod, kung saan aktibong nakikilahok si Mayor Solomon sa mga seremonya ng paggunita bilang miyembro ng Knights of Rizal.

Bukod dito, may umiiral ding Sister City Agreement ang Jersey City at ang Lungsod ng General Santos sa Pilipinas.