BILANG bahagi ng kampanya ng pamahalaan para sa inklusibong pag-unlad at pangmatagalang pagpapaunlad ng sektor ng pangisdaan, pinangunahan ni Pangulong Ferdinand R. Marcos Jr. ngayong Biyernes ang pamamahagi ng ₱22.85 milyong halaga ng tulong-pangkabuhayan para sa mga mangingisda sa General Santos City at karatig-baybaying mga komunidad.

Ipinagkaloob ni Pangulong Marcos ang iba’t ibang tulong mula sa Bureau of Fisheries and Aquatic Resources (BFAR) sa halagang ₱22,852,941 sa isinagawang Ugnayan with Fisherfolk town hall meeting sa Barangay Tambler, kung saan personal siyang nakipag-ugnayan sa mga stakeholder ng pantalan, lokal na mangingisda, at mga kinatawan ng industriya.

Kasama si Kalihim ng Agrikultura Francisco Tiu Laurel Jr. at mga opisyal ng BFAR, sinabi ng Pangulo na bahagi ito ng mas malawak na layunin ng kanyang administrasyon na bigyang-lakas ang mga maliliit na mangingisda, palakasin ang kanilang produksyon, at tiyakin ang seguridad sa pagkain.

Isinabay rin sa aktibidad ang inspeksyon sa operasyon ng tuna unloading at auction sa PFDA-General Santos Fish Port Complex (GSFPC), na kasalukuyang isinasailalim sa modernisasyon upang umayon sa mga pandaigdigang pamantayan.

Tinatayang 200,000 manggagawa ang sumusuporta sa operasyon ng pantalan, na isa sa mga sentro ng industriya ng tuna sa bansa.