PATULOY pa rin ang masinsing pag-aalburoto ng Bulkang Mayon sa ika-23 araw nito, kung saan namataan ang tuloy-tuloy na pag-agos ng nagbabagang lava, paglabas ng pyroclastic density currents o tinatawag na “uson,” at walang humpay na pagbagsak ng mga bato, batay sa kuhang bidyo nitong Huwebes, Jan. 29.

Ayon sa ulat ng Phivolcs, umabot na sa humigit-kumulang 3.7 kilometro ang inabante ng lava sa Basud Gully sa silangan, habang nasa 1.6 kilometro naman ito sa Bonga Gully sa timog-silangan at 1.3 kilometro sa Mi-isi Gully. Nanatiling nakataas sa Alert Level 3 ang bulkan at mahigpit pa ring ipinagbabawal ang pagpasok sa loob ng 6-kilometrong permanent danger zone.