NANAWAGAN si Pangulong Ferdinand R. Marcos Jr. sa mga kasaping ekonomiya ng Asia-Pacific Economic Cooperation (APEC) na patuloy na isulong ang paglago, inklusibidad, at pagpapanatili sa gitna ng mga kasalukuyang hamong pandaigdig.

“Tayo ngayon ay humaharap sa mga hamon na maaaring hindi pa nasasaisip o napaghandaan nang binuo ang ating rules-based system—kaya’t kinakailangan nating maging maagap, masigla, at may pananaw sa hinaharap,” pahayag ni Pangulong Marcos sa kanyang talumpati sa APEC Economic Leaders’ Meeting na ginanap sa Hwabaek International Convention Center (HICO) sa Gyeongju, South Korea.

“Habang sinisikap nating tugunan ang mga hamong ito, huwag nating kalimutan ang ating mga layunin—ang pagdadala ng paglago, pagiging inklusibo, at pagpapanatili sa ating rehiyon, gayundin ang mga pangunahing prinsipyo ng pagiging bukas, di-pagkiling, at pagiging malinaw,” dagdag pa ng Pangulo.

Dumating si Pangulong Marcos sa Republic of Korea noong Huwebes upang dumalo sa Ika-32 APEC Economic Leaders’ Meeting sa Gyeongju, at upang makipagpulong sa mga nangungunang negosyante, mamumuhunan, at sa komunidad ng mga Pilipino roon.

Ang APEC 2025 ay may temang “Building a Sustainable Tomorrow”, na sumasalamin sa pangako ng Republic of Korea (ROK) na bumuo ng isang napapanatili at inklusibong kinabukasan alinsunod sa APEC Putrajaya Vision 2040.

Itinala ni Pangulong Marcos ang ilang pangunahing larangan kung saan maaaring magtulungan ang mga kasaping bansa ng rehiyon:

Pagtutok sa ganap na pagpapanumbalik ng dispute settlement mechanism at Appellate Body ng World Trade Organization (WTO);

Pagsuporta sa pagbuo ng mga bagong polisiya at alituntunin na magpapalakas sa kalakalan sa digital era at magpapabuti sa kapaligiran ng mga negosyo;

Pagsusulong ng pandaigdigang adyenda sa pagpapanatili, pagpapatatag ng seguridad sa pagkain, at pagtatapos ng mga negosasyon para sa Fisheries Subsidies Agreement.

Binigyang-diin din ng Pangulo ang kahalagahan ng pagtatatag ng mas matalino at napapanatiling supply chains sa pamamagitan ng reporma sa regulasyon, digitalization, at pagsasanay ng kasanayan upang higit pang mapatatag ang konektibidad sa rehiyon.

Dagdag pa niya, mahalagang paigtingin ang kooperasyon, transparency sa mga regulasyon, at capacity-building initiatives, habang tinitiyak na ang digital transformation at ang responsableng paggamit ng artificial intelligence (AI) ay nakapag-aambag sa makatarungan at inklusibong paglago sa buong rehiyon.

Binigyang-diin ni Pangulong Marcos na dapat mapanatili ng APEC ang lakas at kabuluhan nito sa pamamagitan ng pagbubuklod sa pagkakaiba, pagpapalakas ng kakayahan, at pagtatatag ng tiwala sa isa’t isa ng mga kasaping bansa.

Sa pagtatapos, tiniyak ng Pangulo ang kahandaan ng Pilipinas na makipagtulungan sa lahat ng kasaping bansa at katuwang ng APEC upang maisulong ang isang bukas, magkakaugnay, at handa sa hinaharap na rehiyon—na matatag sa gitna ng mga hamon at sama-samang makakamtan ang ibinahaging kasaganaan.