Calendar
Kasama ni PAGCOR Chairman and CEO Alejandro H. Tengco (center) ang mga opisyal at kinatawan mula sa 12 LGUs na tumanggap ng bagong Patient Transport Vehicles mula sa ahensya noong Oktubre 21, 2025 sa PAGCOR Corporate Office sa Pasay City.
PAGCOR nagkaloob ng bagong ‘lifeline-on-wheels’ sa 12 LGUs
NAKATANGGAP ng brand-new Patient Transport Vehicles (PTVs) mula sa Philippine Amusement and Gaming Corporation (PAGCOR) ang 12 local government units (LGUs) sa bansa upang matiyak ang kanilang maayos at mabilis na pagresponde sa mga emergency.
Kabilang sa mga nabigyan ng PTV ang mga bayan ng Calumpit (Bulacan), Baras (Rizal), New Bataan (Davao de Oro), Bugallon (Pangasinan), Toboso (Negros Occidental), Sultan Kudarat (Maguindanao del Norte), Burgos, Laoag, Bacarra, Sarrat, at Pasuquin (Ilocos Norte), at ang Lungsod ng Navotas.
Bawat sasakyan ay kumpleto sa gamit tulad ng GPS navigation system, ambulance stretcher, medical oxygen, wheelchair, at first aid kit.
Pinangunahan ni PAGCOR Chairman and CEO Alejandro H. Tengco ang turnover ceremony sa PAGCOR Corporate Office sa Pasay City, kung saan binigyang-diin niya ang kahalagahan ng mga PTV sa mga liblib na lugar o madalas tamaan ng kalamidad.
“These vehicles are not merely means of transport,” ani G. Tengco. “They are lifelines that can make the difference between life and death for those in need of urgent medical attention.”
Nagpasalamat si New Bataan Mayor Atty. Mar Bianca Cualing-Brua sa donasyon, lalo na’t kamakailan lang ay niyanig ng malalakas na lindol ang ilang bahagi ng Visayas at Mindanao.
“When calamities strike, local governments rely on their own capacities and resources for emergency medical services. Donations like this are crucial,” aniya. “We are truly grateful to PAGCOR for choosing our town as a recipient.”
Ganoon din ang sentimento ni Toboso Mayor Richard Jaojoco na sinabing malaking tulong ang PTV lalo na sa mga pasyenteng nangangailangan ng dialysis at agarang lunas.
“This will be a huge help, especially for dialysis patients and anyone needing emergency care. We are far from major cities, so having this PTV is truly lifesaving,” sabi ni Jaojoco.
Mula noong Pebrero 2 ay nakapamahagi na ang PAGCOR ng 142 PTVs sa iba’t ibang LGU at ahensya sa buong bansa, kabilang ang 70 unit na itinurn-over kamakailan sa Philippine Charity Sweepstakes Office (PCSO).
