WALANG confidential funds ang yumaong si dating Sen. Benigno “Ninoy” Aquino Jr., ayon kay Sen. Bam Aquino matapos siyang banggitin ni Sen. Robin Padilla bilang halimbawa ng isang taong gumamit ng alyas habang tinatalakay sa impeachment trial ni Vice President Sara Duterte ang mga alyas sa mga dokumento ng Office of the Vice President.

“Walang confidential funds si Ninoy Aquino,” sagot ni Aquino kay Padilla.

Iginiit ni Padilla na hindi bago sa kasaysayan ng Pilipinas ang paggamit ng alyas, at binanggit na gumamit din ng ibang pangalan ang ilang pambansang bayani at mga rebolusyonaryo noong panahon ng himagsikan.

Binanggit din niya ang paggamit ni Ninoy sa pangalang “Marcial Bonifacio.”

Itinangi ni Aquino ang kaso ng kanyang tiyuhin sa mga transaksyong sinusuri ng impeachment court, na sinabing walang kinalaman ang alyas ni Ninoy sa pagtanggap, paggastos o pag-liquidate ng confidential funds.

Ginamit ni Ninoy ang pangalang “Marcial Bonifacio” sa isang Philippine travel document nang bumalik siya sa Pilipinas mula Estados Unidos noong Agosto 21, 1983.

Lumutang ang palitan nina Padilla at Aquino habang patuloy na sinusuri ng impeachment court ang mga pangalan sa acknowledgment receipts na ginamit bilang supporting documents sa confidential-fund expenditures ng OVP.

Nauna nang tumestigo si dating OVP special disbursing officer Gina Acosta na ang mga pangalang gaya nina “Pusa,” “Pagong,” “Ngitngit” at “Belat” ay mga alyas ngunit tumutukoy umano sa mga tunay na tao.

Sinabi ni Acosta na wala siyang record ng tunay na pagkakakilanlan ng mga ito at si Col. Raymund Dante Lachica ang nakaaalam kung sino sila.

Inamin din ni Acosta na hindi niya personal na nasaksihan kung ibinigay ni Lachica ang mga halagang nakasaad sa acknowledgment receipts sa mga taong nakapangalan sa mga dokumento.

Sa isang resibo, nakasaad na tumanggap si Antonio Pagong ng P100,000 para sa purchase of information. Nakasaad naman ang P100,000 para sa rental ng transport vehicle sa resibong nakapangalan kay Timon Andrew Pusa, habang P150,000 ang nakasaad sa resibo ni Shane Ngitngit at P100,000 sa pangalan ni Xuniso P. Belat.

Nauna ring tumestigo ang mga auditor ng Commission on Audit na tahimik ang Joint Circular 2015-01 sa paggamit ng alyas sa acknowledgment receipts—hindi ito tahasang pinapayagan o ipinagbabawal.

Ang Joint Circular 2015-01 ang nagtatakda ng mga patakaran sa entitlement, release, paggamit, pag-uulat at pag-audit ng confidential at intelligence funds.

Tumestigo rin si COA state auditor Xylene Mae Del Campo na hindi kabilang ang paggamit ng mga alyas sa mga dahilan ng notice of disallowance na inilabas sa bahagi ng confidential-fund expenditures ng OVP.

Sinabi rin ni Del Campo na compliance audit ang isinasagawa ng kanilang tanggapan batay sa mga dokumentong isinusumite at hindi nito bineberipika ang pagkakakilanlan ng bawat recipient na nakalista sa acknowledgment receipts.

Itinaas naman ni Aquino sa naunang pagdinig ang Republic Act 6085, ang batas na kumokontrol sa paggamit ng mga alyas.

Wala pang pinal na pasya ang impeachment court kung ano ang magiging bigat ng mga kuwestiyunadong alyas at acknowledgment receipts sa pagdetermina ng pananagutan sa confidential-fund transactions ng OVP.