IPINAHAYAG ni Senate President Pro Tempore Panfilo “Ping” Lacson na uunahin niya ang internal cleansing ng Senate Blue Ribbon Committee bilang bagong chairman nito kasabay ng pagtutok sa trabaho at pagpapatuloy ng mga nasimulan ng dating pinuno.

Binigyang-diin ni Lacson ang pangangailangan ng internal cleansing matapos maiugnay ang umano’y staff ni Sen. Jinggoy Estrada sa isang “delivery of obligation” (“lagay”) sa pagdinig ng Kongreso nitong Martes na kinilala ni Estrada bilang staff ng Blue Ribbon panel.

“Since I am not sure if there is only one Beng Ramos in the Blue Ribbon Committee which I was just elected by my peers to chair, just like (Department of Public Works and Highways Secretary) Vince Dizon, maybe I also need to do a simultaneous internal cleansing while buckling down to work,” dagdag niya.

Iginiit niya na mahalaga ang paglilinis dahil ang Blue Ribbon Committee ang inaatasan na tumingin sa mga umano’y maling gawain sa pamahalaan at tiyakin ang pananagutan.

Pormal na nahalal bilang Blue Ribbon Committee chairman si Lacson noong Martes.

Noong Martes din, sinabi ni dating Bulacan assistant district engineer Brice Hernandez sa pagsisiyasat na umano’y tumanggap si Estrada ng 30-porsiyentong kickback mula sa P355 milyon na alokasyon.

Nagpakita si Hernandez ng mga larawan nina Estrada at ng dating Bulacan first engineering district head na si Henry Alcantara pati screenshots ng palitan ng mensahe na kinasasangkutan umano ng isang staff ni Estrada na tinukoy bilang Beng Ramos.

Itinanggi ni Estrada ang mga paratang at sinabi na wala siyang staff na nagngangalang Beng Ramos.