KINUWESTIYON ni Senator-judge Raffy Tulfo kung “kamay na bakal” ang ginagamit ng law enforcers laban sa ordinaryong mamamayan ngunit “kid gloves” naman sa makapangyarihang opisyal habang inuusisa niya ang National Bureau of Investigation sa mga umano’y banta na kinasasangkutan ni Vice President Sara Duterte.

Sa clarification session ng impeachment trial ni Duterte, binanggit ni Tulfo ang mga naunang kaso kung saan inaresto ang mga ordinaryong mamamayan dahil sa mga banta o alok na pabuya laban kay dating Pangulong Rodrigo Duterte.

Tinukoy niya ang isang guro, construction worker at unemployed college graduate, saka inihambing ang sinapit nila sa nagpapatuloy na case build-up kaugnay kina Duterte at Davao City Mayor Sebastian “Baste” Duterte.

“So kamay na bakal ang pinairal kapag mga ordinary mahirap na mamamayan, pinapairal ninyo sa law enforcement. Pero kapag makapangyarihan ang mga tao, you treat them with kid’s gloves. Why is that?” tanong ni Tulfo kay NBI Director Melvin Matibag.

Sinabi ni Matibag na para lamang sa NBI ang maaari niyang ipaliwanag, hindi ang ginawa ng ibang law-enforcement agencies na sangkot sa mga naunang pag-aresto.

Sumang-ayon siyang warrantless ang mga pag-aresto at sinabi niyang iyon ang dahilan kung bakit ibinasura ang mga kaso.

“Respectfully po, Your Honor, unang-una, I cannot speak to the behavior of the law enforcement at that time. But I agree with you, iyong pag-arrest sa kanila is warrantless arrest. That’s the reason why na-dismiss lahat ng kaso na ’yan,” sinabi ni Matibag.

Ayon sa kanya, sinusunod ng NBI ang case-build-up process sa imbestigasyong may kaugnayan kay Duterte.

Magsasampa umano ang mga imbestigador ng kaso kapag sapat na ang ebidensya. Ang korte naman ang magpapasya kung maglalabas ng warrant of arrest.

“Sa ngayon, iyong mga pangyayari na ito, we go to the case build-up and file a case, katulad ng nangyari kay Vice Presidente, may pending kaso. Kung ito ma-file sa korte, that is the time the court will issue a warrant of arrest. So mayroon tayong prosesong sinusunod po,” sinabi niya.

Kinilala ni Tulfo na mali ang mga naunang pag-aresto dahil walang warrant, ngunit tinanong niya kung may nag-utos sa mga law enforcer na gawin iyon.

Tinanong din niya kung ano ang kaibahan ng pagpapatupad ng batas noon sa kasalukuyang paraan ng NBI.

Sinabi ni Matibag na tinitiyak ng kawanihan na sumusunod ang mga tauhan nito sa batas at tamang proseso.

“We are making sure that we are following the process and the law. In any case, wala pong malaki o maliit na kaso. Ang tinitingnan po lagi natin dito ay ang ebidensya, ang batas at prosesong dapat pong sundin,” sinabi niya.

Nagbigay din si Tulfo ng hypothetical na tanong: Ano kaya ang nangyari kung noong administrasyong Duterte ay nagbanta si noo’y Vice President Leni Robredo laban sa Pangulo at sinundan ito ng katulad na pahayag ng kanyang anak?

Nilinaw ni Tulfo na hindi niya nakikitang gagawin iyon ni Robredo dahil wala umano ito sa kanyang karakter.

Tinanong niya kung posibleng ipinag-utos noon ang agarang pag-aresto kay Robredo, tulad ng nangyari sa mga ordinaryong mamamayang kanyang binanggit.

Sinabi ni Matibag na humihingi ng opinyon ang tanong, ngunit batay sa mga naunang pag-aresto, posibleng agad na inaresto noon ang isang bise presidente.

“Siguro meron po akong puwedeng pagbasihan, base na rin po sa inyong sinasabi na construction worker, teacher ay naaresto dahil sa banta. So posible po, may possibility na baka arestuhin kaagad ang vice president noon,” sinabi ni Matibag.

Nakatuon ang mga tanong ni Tulfo sa kung pareho ba ang pamantayan ng pagpapatupad ng batas sa ordinaryong mamamayan at sa makapangyarihang opisyal.

Nanindigan si Matibag na ebidensya, batas at tamang proseso ang sinusunod ng NBI.

Walang naging pasya ang impeachment court na pinaboran ng NBI o ibang ahensya si Duterte.