NAGPAHAYAG ng matitinding posisyon ang mga senador laban sa online gambling sa isinagawang pagdinig ng Senate Committee on Games and Amusement nitong Huwebes, Agosto 14, 2025. Ilan sa mga mambabatas ay nanawagan ng ganap na pagbabawal habang ang iba ay binigyang-diin ang pangangailangan ng komprehensibong mga hakbang na pambatas.

Binuksan ni Committee Chairman Senador Erwin Tulfo ang pagdinig sa pamamagitan ng panawagan para sa agarang at lubos na pagtigil sa online gambling. “As long as online gambling exists, we are breeding the next generation of addicts, debtors, and broken families. No amount of tax revenue can justify this human cost,” ani Tulfo.

Idinetalye niya ang mga hakbang tulad ng pagbabawal sa aktibidad, kriminalisasyon sa lahat ng anyo nito, pagbabara sa mga platform, pagsamsam sa mga server, at pagsasampa ng kaso laban sa mga operator pati na rin sa mga kasabwat mula sa pamahalaan at pribadong sektor.

Ipinabatid ni Tulfo na mula Setyembre 2022 hanggang Agosto 6, 2025, natukoy ng mga awtoridad ang kabuuang 11,985 na iligal na online gambling sites: 6,363 na online casino games, 236 offshore sites, at 4,813 online sabong links. Mahigit 3,000 sa mga ito ay aktibo pa rin sa kabila ng mga pagsisikap sa pagpapatupad ng batas.

Binigyang-diin ni Deputy Minority Leader Risa Hontiveros na ang matinding pagkahumaling sa online gambling ay dapat ituring bilang isyung pangkalusugang pangkaisipan. Tinukoy niya ang Diagnostic and Statistical Manual of Mental Disorders, Fifth Edition (DSM-5), na nag-uuri sa gambling disorder bilang isang mental health condition. Iminungkahi ni Hontiveros ang pagbuo ng komprehensibong batas upang tugunan ang problema, lampas sa mga patakaran lamang na administratibo na aniya’y madaling mabago ayon sa opinyon ng publiko.

Ipinunto rin niya ang pangangailangang magtulungan ang mga ahensya tulad ng PAGCOR at Bangko Sentral ng Pilipinas upang higpitan ang akses sa mga gambling platform.

Ipinakilala ni Deputy Minority Leader Sen. Risa Hontiveros ang kanyang Kontra E-Sugal Bill na naglalayong harangin ang online gambling sa pamamagitan ng e-wallets at super apps, na inilarawan niyang “unli-sugal, walang bantay, at wala ring awa.”

Iginiit naman ni Senate Deputy Minority Leader Juan Miguel Zubiri na ang online gambling ay isang “krisis na sumisira sa mga pamilya, kabuhayan, at kinabukasan ng mga Pilipino.” Bilang patunay sa mabilis na paglago ng industriya, inilahad niya ang gross gaming revenue: P8 bilyon noong 2022, P33.16 bilyon noong 2023—isang 414 porsyentong pagtaas—at P135.71 bilyon noong 2024. Sa unang kalahati pa lamang ng 2025, aniya, ay umabot na ito sa P106.53 bilyon. Binigyang-babala rin niya ang posibleng ugnayan nito sa tumataas na kriminalidad at ipinahayag ang suporta sa ganap na pagpawi ng online gambling.

Tinukoy naman ni Senador Pia Cayetano ang mga kasong may kinalaman ang online gambling sa money laundering, cybercrimes, at mga isyung pangkalusugang pangkaisipan. Isa na rito ang ulat ng isang 22-anyos mula Benguet na nagpakamatay dahil sa pagkakautang sa sugal. Ipinunto niya ang isang 2023 nationwide survey na nagsasabing 66% ng mga Pilipinong may edad 18 hanggang 24 ay nakaranas ng online gambling, kadalasan kapalit ng kanilang pag-aaral, pinansyal na kakayahan, at mental na kalusugan. Sa patuloy na pagtaas ng kita mula sa sugal—mula P12.91 bilyon noong 2020 hanggang P154 bilyon noong 2024, at P114 bilyon na sa unang bahagi pa lang ng 2025—sinabi ni Cayetano na nagsampa siya ng panukalang batas para sa total ban at umaasang hindi na kakailanganin pang isaalang-alang ang buwisan ang industriya kung ito ay tuluyang ipagbabawal.

Nanawagan din si Senador Alan Peter Cayetano sa kapwa senador, mga ahensya ng gobyerno, at iba pang stakeholder na makabuo ng tinawag niyang “right decision” sa isyung ito. Bagamat kinikilala ang PAGCOR at Department of Finance na nakatuon sa kita, sinabi niyang dapat pagtuunan ng pansin ng pamahalaan ang epekto nito sa lipunan. Ibinahagi niya ang ordinansa ng Taguig City na nagbabawal sa lahat ng anyo ng sugal—kasama na ang mga casino, POGOs, sabungan, at bingo halls—bilang hakbang upang maitanim sa kabataan ang pagpapahalaga sa sipag at tamang pamamahala ng pera. Ipinunto rin niya ang pagkakaiba ng pagpapatupad ng batas sa maliliit na sugal kumpara sa malayang akses ng mga estudyante sa online gambling sa pamamagitan ng cellphone. Inilahad niyang naghain siya ng mga panukala gaya ng Senate Bill No. 30 o Ban on Online Gambling Act na co-author niya si Senadora Pia Cayetano, at Senate Bill No. 109 o Anti-Online Gambling Advertisement Act of 2025 na layong ipagbawal ang promosyon ng sugal sa lahat ng media platform.

Ipinahayag naman ni Senador Joel Villanueva ang patuloy niyang suporta sa mga patakarang naglalayong protektahan ang pamilya at kabataan mula sa pagkakalulong sa sugal. Bagamat wala siyang bagong datos na inilahad, malinaw na sinang-ayunan niya ang posisyon ng iba pang senador sa pagtutol sa online gambling.

Sa kasalukuyan, muling sinusuri ng Committee on Games and Amusement ang iba’t ibang panukalang batas na naglalayong tuluyang ipagbawal o higpitan ang regulasyon ng online gambling sa Pilipinas.