IBINASURA ni Atty. Ade Fajardo, spokesperson ni dating Speaker Ferdinand Martin G. Romualdez, noong Lunes ang mga paratang na inilahad sa pagdinig sa Senado, at sinabing bagsak ang mga ito sa harap ng sinumpaang testimonya at sa kawalan ng dokumentaryong ebidensiya.

Sinabi ni Fajardo na iginiit ng kontratistang si Pacifico “Curlee” Discaya sa kanyang sinumpaang testimonya na kailanman ay hindi pa siya nakapasok sa South Forbes Park, at pinabulaanan ang mga pahayag ng dalawang testigo sa Senado na gumamit ng mga alyas na “Joy” at “Marie,” na nagsasabing nilapitan umano niya ang sinuman doon o nagbigay ng mga tagubilin na may kaugnayan sa nasabing ari-arian.

“The allegations aired in the Senate are logically and physically impossible,” ani Fajardo.

“Curlee Discaya testified under oath that he has never entered South Forbes Park, making it impossible for him to have approached anyone there or issued any instruction,” dagdag niya.

Giit pa niya, nagmula lamang umano ang mga akusasyon sa mga tauhan ng isang pinaalis na nangungupahan at hindi sinusuportahan ng anumang dokumento.

“The claims come solely from the staff of an evicted tenant, unsupported by any document,” pahayag ni Fajardo, at binigyang-diin na ang pangalan ni Romualdez “appears in no deed, contract or payment record related to the property.”

Ayon kay Fajardo, wala nang dapat pang sagutin batay sa mga rekord.

“There is no evidence ― only hearsay and possibly perjured statements ― and therefore nothing to answer,” sinabi niya.

Binigyang-diin din niya na ang mga alegasyong inilalantad sa mga pampublikong pagdinig ay dapat sinusuri laban sa sinumpaang testimonya at mapatutunayang mga dokumento.

Iginiit pa niya na ang mga haka-haka na walang kalakip na papeles ay hindi maituturing na patunay.