NAGHAIN si Marikina City Rep. Miro Quimbo, Tagapangulo ng House Committee on Ways and Means, ng House Resolution (HR) No. 636 na nag-uutos sa mga kaukulang komite na magsagawa ng isang imbestigasyon, bilang tulong sa paggawa ng batas, hinggil sa patuloy na pagdami ng malakihang smuggling ng tabako at ang epekto nito sa kalusugan ng publiko at kita ng pamahalaan.

Binanggit ni Quimbo ang pagkakasabat noong Enero 1, 2026 ng 32 trak na may kargang umano’y smuggled na sigarilyo na nagkakahalaga ng humigit-kumulang ₱2.6 bilyon. Ang mga ito ay naharang ng Philippine National Police sa magkakaugnay na operasyon sa Batangas at Malabon. Ayon sa mambabatas, pinatutunayan ng nasabing pagkakasabat na nananatiling seryosong pambansang problema ang organisadong smuggling ng sigarilyo na nangangailangan ng agarang aksyon.

Dahil ang mga smuggled na produkto ay nakakaiwas sa pagbabayad ng buwis, ang nasabat na kargamento ay katumbas ng ₱875.16 milyong buwis na sana’y nakolekta ng pamahalaan batay sa tax rate ng 2026.

Noong 2023, iniulat ng Bureau of Internal Revenue (BIR) na tinatayang ₱25.5 bilyon ang nawala sa pamahalaan mula sa excise taxes dahil sa iligal na kalakalan ng tabako.

Binigyang-diin ng mambabatas mula Marikina na pinahihina ng malakihang smuggling ng tabako ang mga patakaran sa pampublikong kalusugan at ang pagpapatupad ng buwis, dahil artipisyal nitong pinabababa ang presyo ng sigarilyo at sinisira ang layunin ng mga reporma sa sin tax.

“Kung hindi napipigilan ang malakihang smuggling, bumabagsak ang presyo ng sigarilyo. At ang malinaw na agwat ng presyo sa pagitan ng legal at smuggled na sigarilyo ay pinapahina ang epekto ng sin taxes at iba pang mga repormang pangkalusugan na ating nakamit. Sa patuloy na smuggling ng sigarilyo, mas nagiging madaling maabot ang bisyo ng kabataan at ng ating mahihirap na kababayan. Patuloy ding nawawalan ng pondo ang gobyerno para sa mga programang pangkalusugan, lalo na ang PhilHealth,” pahayag ni Quimbo.

Sa pamamagitan ng resolusyon, rerepasuhin ng Kongreso ang kasalukuyang mga sistema ng pagpapatupad ng batas, ang koordinasyon ng mga ahensya, at ang umiiral na mga parusa upang matukoy kung sapat pa ang mga ito upang pigilan ang malakihang iligal na kalakalan ng tabako.

Ayon kay Quimbo, makatutulong ang imbestigasyon upang maisara ang mga puwang sa regulasyon, mapahigpit ang pagbabantay sa buong supply chain ng tabako, at matiyak na mapapanagot ang mga smuggler upang makapagkumpitensya nang patas ang mga lehitimong negosyo.

“Bagama’t naging masigasig ang ating mga ahensya ng pagpapatupad ng batas sa kasong ito, ipinapakita ng lawak ng problema ang pangangailangan ng mga sistemikong reporma. Hindi dapat hayaang kumita ang mga smuggler kapalit ng kalusugan ng publiko at ng buwis ng mamamayan,” dagdag niya.

Nanawagan ang resolusyon na magsilbing batayan ang magiging resulta ng imbestigasyon para sa mga panukalang batas na magpapatibay sa mga mekanismo laban sa smuggling at magpoprotekta sa katatagan ng pananalapi ng bansa.