AYON kay Senate President Pro Tempore Panfilo “Ping” Lacson, makatutulong ang mga utos ni Pangulong Ferdinand Marcos Jr. na agarang bayaran ang mga kontratistang maayos ang performance at regular na bantayan ang mga proyekto upang maiwasan ang isang nakaambang krisis sa imprastraktura.

Sinabi ni Lacson na tinutugunan ng mga hakbang ang pag-aatubili, at sa ilang kaso ay pagtanggi, ng mga kontratista na lumahok sa mga bidding para sa mga proyekto ng Department of Public Works and Highways (DPWH).

“Spot on. Amidst reluctance, even refusal of many contractors to participate in public biddings for the DPWH infrastructure projects, the President’s order to facilitate the payment of outstanding obligations to contractors who delivered on their contracted government projects will help prevent a looming infrastructure crisis brought about by the ongoing reforms in the DPWH in the proper utilization of the national budget,” ani Lacson.

Dagdag niya, pinalala ng tumataas na gastos sa konstruksyon at mas mahigpit na reporma sa paggamit ng badyet ang pag-ayaw ng ilang kontratista na sumali sa mga bidding.

Nauna ring sinabi ni Lacson na dapat maging handa ang DPWH na harapin ang mga kontratistang ayaw lumahok sa bidding, lalo na ang mga nasanay sa labis na kita dahil sa mga paunang bayad sa ilang mambabatas at opisyal ng pamahalaan.

Noong Lunes, sinabi ng Malacañang na inutusan ng Pangulo ang mga ahensya ng gobyerno na tiyaking mababayaran ang mga kontratistang maayos ang performance at responsable sa kanilang mga proyekto. Inatasan din ang mga ahensya na sumailalim sa pagmomonitor ng mga proyekto tuwing dalawang linggo at binalaan laban sa pagsusumite ng hindi tumpak o pinapaganda lamang na mga ulat.

Ayon kay Lacson, ang mga kontratistang sanay makipagtransaksyon sa mga mambabatas na may komisyon ay kadalasang nauuwi sa overpricing upang mabawi ang kanilang mga paunang bayad.

Binanggit niya ang kaso ng mga Discaya, na ayon sa kanya ay naningil umano sa mga mambabatas matapos silang bigyan ng paunang bayad bilang mga kontratista.

“Their gimmick was that if the congressmen did not pay up, they would list them in their ledgers,” ani Lacson.

Batay sa testimonya ng dating DPWH Undersecretary Roberto Bernardo, sinabi ni Lacson na tinangka umanong maningil ng P30 milyon hanggang P40 milyon ang mga Discaya mula sa ilang mambabatas at regional director.

“Why charge advances to the national budget? That’s on them — charge it to experience. They gambled,” dagdag pa niya.