DUMATING nang ligtas ngayong Pebrero 5, 2026 sa NAIA Terminal 1, Pasay City ang kabuuang 190 Pilipinong biktima ng human trafficking (HTVs) mula Cambodia, sakay ng isang chartered flight ng Pamahalaan ng Pilipinas.

Personal na sinalubong ni Migrant Workers Secretary Hans Leo J. Cacdac, kasama ang iba pang mga opisyal mula sa whole-of-government team, ang mga repatriate, na tiniyak na makatatanggap sila ng lahat ng kinakailangang tulong at suporta alinsunod sa direktiba ni Pangulong Ferdinand R. Marcos Jr.

Kabilang sa mga ahensiyang sumalubong at nagbigay ng tulong sa mga repatriate ang Department of Migrant Workers (DMW), Overseas Workers Welfare Administration (OWWA), Department of Social Welfare and Development (DSWD), Department of Foreign Affairs (DFA), Department of Health (DOH), Presidential Anti-Organized Crime Commission (PAOCC), Department of Justice (DOJ), Bureau of Immigration (BI), PNP Women and Children Protection Center, PNP Anti-Cybercrime Group, International Organization for Migration, Blas F. Ople Policy Center, NBI International Airport Investigation Division, at NBI Human Trafficking Division.