INANUNSYO noong Biyernes ni Philippine National Police (PNP) spokesperson Brigadier General Randulf T. Tuaño ang pag-aresto sa tatlong natitirang suspek sa pagpaslang sa isang operatiba ng PNP Drug Enforcement Group (PNP-DEG) na ang bangkay ay itinapon ng mga salarin sa isang septic tank sa isang bahay sa Malolos City, Bulacan noong Sabado ng umaga.

Ayon sa opisyal, ang hinihinalang gunman sa pagpatay kay Police Staff Sergeant Renato Casauay Jr., na kinilalang si Monjeanne Julian Salamat alyas “Mon,” 28, at residente ng Barangay Sto. Niño sa bayan ng Paombong, ay nadakip ng mga tauhan ng Police Regional Office 3 (PRO3) at Bulacan Police Provincial Office sa kanyang pinagtataguan sa Barangay Magugpo West, Tagum City, Davao del Norte bandang alas-8 ng umaga noong Miyerkules.

Ang ikalawang suspek na si Albert Maglinis alyas “Egoy/Echo,” 34 taong gulang, ay isinuko sa pulisya ng kanyang mga kamag-anak sa Barangay Poblacion, Alicia, Isabela bandang alas-5 ng hapon noong Miyerkules. Samantala, ang ikatlong suspek na si Marvin Nolasco, 32 taong gulang at residente ng Delpan Street, Barangay Atlag, Malolos City, ay sumuko sa mga pulis ng Malolos City Police Station bandang alas-12:30 ng hapon noong nakaraang Martes.

Ang tatlo ay tuluyan nang nasa likod ng rehas matapos ang malawakang manhunt na inilunsad ng Bulacan Police Provincial Office sa pamumuno ni Colonel Angel L. Garcillano laban sa mga pumatay kay PSSgt. Casauay noong Enero 24.

Sinabi ni Col. Garcillano na natunton nila si Salamat sa kanyang pinagtataguan sa Tagum City sa tulong ng mga impormante. Lumabas sa imbestigasyon na isang araw matapos ang pagpatay, nagtungo ang suspek sa Maynila at kalaunan ay sumakay ng eroplano patungong Cebu. Mula Cebu, nagbiyahe siya sa Dumaguete City sa pamamagitan ng lupa at pagkatapos ay dumaan sa mas mahabang ruta patungong Tagum City.

Ayon pa sa hepe ng pulisya ng Bulacan, narekober na rin ang lisensiyadong kalibre .9mm semi-automatic pistol ni Salamat na pinaniniwalaang ginamit sa pagpatay sa anti-narcotics agent.

Sinabi ni Garcillano na ang tatlong suspek at apat pang iba na naaresto ay nagpositibo rin sa ilegal na droga sa isinagawang drug test. Dagdag pa niya, hinahanap din para sa imbestigasyon ang ama ng isa sa mga suspek matapos matuklasan na ipinaalam sa kanya ng kanyang anak at ng ilan sa mga akusado na may napatay na tao malapit sa kanilang compound.

“Nagalit ang tatay at nang tanungin ng anak kung ano ang gagawin nila, ang sinabi niya ay tanggalin at mangangamoy,” ayon sa opisyal, batay sa mga bahagi ng extrajudicial statements na nilagdaan ng ilang suspek na nasa kustodiya ng pulisya.

Narekober ang bangkay ng biktima mula sa isang septic tank sa isang bahay sa Felicisima Village, Barangay Mojon, Malolos City noong Enero 31, ayon kay PRO3 director Brigadier General Ponce Rogelio I. Peñones Jr.

Inaresto ng mga operatiba ng PRO3 si Salamat sa tulong ng Tagum City Police Station. Samantala, dinakip si Maglinis ng mga miyembro ng Bulacan PPO at PRO3 Regional Special Operations Group, katuwang ang Isabela PPO, sa Alicia, Isabela matapos ang pakikipag-usap sa kanyang mga kamag-anak.

Si Nolasco naman ay isinuko ng kanyang pamilya sa Malolos City Police Station.

Noong Martes, nag-alok si Department of the Interior and Local Government (DILG) Secretary Juanito Victor C. Remulla Jr. ng P1 milyong pabuya para sa sinumang makapagbibigay ng impormasyon na hahantong sa pag-aresto kay Salamat, isa sa mga pangunahing suspek sa pagpatay sa 48-anyos na ahente ng PNP-DEG.

Sinabi ni Brig. Gen. Peñones na inaresto rin nila ang isang miyembro ng Bulacan PPO na kinilalang si Corporal Vivencio Abalos dahil sa kabiguang arestuhin ang suspek matapos umano itong lumapit sa kanya at umamin sa pagpatay kay Casauay.

“Nang mangyari ang insidente, noong hapon, si Julian Salamat at isang saksi ang nag-report kay Cpl. Abalos tungkol sa naganap na pagpatay, kung paano niya binaril si Casauay, pero wala siyang ginawa,” ayon sa Central Luzon police director.

“Wala siyang ginawa. Bilang isang pulis, dapat ay agad niyang inaresto ang suspek, pero nalaman na lang namin ang buong istorya makalipas ang anim na araw. Kaya nang mabuo namin ang pangyayari, inaresto namin si Cpl. Abalos bilang accessory to the fact,” dagdag pa ni Brig. Gen. Peñones.

Ipinahayag ni Sec. Remulla, kasama ang PNP chief na si General Jose Melencio C. Nartatez Jr., na ‘solved’ na ang kaso ni PSSgt. Casauay, kahit patuloy pa rin ang malawakang pagtugis ng PRO3 sa iba pang mga suspek.

Natagpuan ang bangkay ni Casauay sa loob ng isang septic tank sa Barangay Mucon, Malolos City noong Sabado, pitong araw matapos siyang huling makita noong Enero 24, na araw ng kanyang kaarawan.

Batay sa imbestigasyon ng PRO3, sinabi ng napatay na pulis sa kanyang asawa na makikipagkita siya sa isang “asset” sa Malolos City sa araw ng kanyang kaarawan. Iniulat siyang nawawala ng kanyang asawa matapos hindi na ito makauwi.

Lumabas sa imbestigasyon na binaril ang pulis nang isang beses sa ulo at dalawang beses sa mga kamay. Ipinakita ni Sec. Remulla sa mga mamamahayag sa Camp Crame ang CCTV footage kung saan makikita ang biktima kasama ang ilan sa mga suspek bago marinig ang hindi bababa sa anim na sunod-sunod na putok ng baril sa lugar.

Nilinis umano ng mga suspek ang pinangyarihan ng krimen at inilagay ang bangkay ng pulis sa septic tank upang itago ang kanilang ginawa. Ayon kay Sec. Remulla, may mga lokal na saksi, kabilang ang mga drayber ng traysikel na naghihintay ng pasahero sa labas ng lugar, ang nakarinig ng mga putok ng baril ngunit hindi ito iniulat sa pulisya.

Iniuugnay ni Brig. Gen. Peñones ang pagpatay kay Casauay sa umano’y pakikialam nito sa operasyon ng grupo ni Salamat na pinaniniwalaang sangkot sa ilegal na droga.

Isa sa mga suspek na kinasuhan kaugnay ng kaso, na kinilalang si Oliver Mauricio, ay lumabas na may-ari ng bahay kung saan pinatay ang pulis.

Sinabi ni Sec. Remulla na patuloy na nangangalap ang mga imbestigador ng PRO3 ng mga CCTV footage at ebidensiyang forensik upang matiyak ang pagkakahatol sa mga suspek. Dagdag pa niya, may mga extrajudicial confession nang nakuha mula sa mga naarestong suspek hinggil sa paglilinis ng pinangyarihan ng krimen.

Ayon pa sa kanya, si Salamat na kinilalang pangunahing suspek ay miyembro ng Black Riders Force Multipliers na tumutulong sa lokal na pulisya.

Bukod kina Salamat at Mauricio, ang iba pang suspek sa kaso ay sina Arvin Santiago at Nick Convoy na sinasabing tumulong sa pagtatago ng krimen.

Ayon sa PRO3 director, napatunayang walang ginawang aksyon si Cpl. Abalos kahit nalaman niyang napatay na ang operatiba ng PNP-DEG.

Bandang alas-11:30 ng gabi noong Enero 31, narekober ang bangkay ng biktima sa no. 001 Green Street, Felicisima Village, Barangay Mojon, Malolos City. Positibong kinilala ang bangkay ng kanyang asawa.

Nakarekober din ang mga imbestigador ng ilang basyo ng bala sa lugar ng insidente.