AYON sa isang mambabatas, ang mga tanong hinggil sa kredibilidad ng nakakulong na testigong si Ramil Madriaga ay dapat resolbahin sa tamang forum, at hindi sa pamamagitan ng mga maagang pag-atake na layong siraan ang kanyang testimonya bago pa ito masuri.

Iginiit niya na ito mismo ang dahilan kung bakit sinimulan ng Kamara ang pagdinig sa reklamong impeachment laban kay Bise Presidente Sara Z. Duterte.

Ang puntong ito ay binigyang-diin nitong nakaraang weekend ni San Juan Rep. Ysabel Maria Zamora, bise chair ng House Committee on Justice, habang sinisikap ng kampo ni Duterte na kuwestiyunin si Madriaga sa pamamagitan ng pagtawag sa kanya bilang isang kontaminadong source bago pa lubusang masuri ng komite ang mga rekord na kaugnay ng reklamo.

“Ang paninindigan namin sa Committee on Justice hinggil sa mga alegasyon na kuwestiyonable ang karakter ni Madriaga—kaya nga tayo may hearing,” ani Zamora sa Saturday News Forum sa Dapo Restaurant sa Quezon City.

“Wala pa naman kaming sinasabing may probable cause na. Hindi pa namin sinasabi na may sapat na basehan upang iakyat ang Articles of Impeachment sa Senado. Sa katunayan, wala pa ngang Articles of Impeachment,” dagdag pa niya.

Ang puntong ito ay tumutukoy sa pangunahing layunin ng komite sa yugtong ito—hindi ang magdeklara ng pagkakasala ng sinuman o magmadali sa pag-akyat ng kaso sa Senado, kundi alamin muna kung may sapat na batayan ang reklamo upang ituloy sa susunod na pormal na hakbang sa proseso ng impeachment.

“Magkakaroon lamang ng Articles of Impeachment kapag sinabi ng House Committee on Justice na may probable cause. Gagawa tayo ng resolusyon at kalakip ng resolusyong iyon ang Articles of Impeachment,” diin niya.

“Sa ngayon, kaya tayo nagpapatawag ng hearing—bukod sa mandato namin na gawin ito—ay upang tukuyin kung may probable cause, kung tama ang mga affidavit na ito, at upang beripikahin ang katotohanan ng mga kalakip sa reklamo at sa sagot kung mayroon man. Kaya wala pa kaming sinasabi na may probable cause na o may Articles of Impeachment na—nandito pa lamang tayo sa yugtong ito.”