SINABI nitong Huwebes ni House Deputy Speaker Albee Benitez ng Bacolod City na inaasahan niyang mahigit 215 mambabatas ang boboto pabor sa pagpapadala ng impeachment case laban kay Vice President Sara Z. Duterte sa Senado para sa paglilitis, habang lumalawak na umano ang suporta mula sa halos lahat ng political parties sa Kamara.

“I think it will probably be more,” sabi ni Benitez sa panayam sa programang “On Point” ng Bilyonaryo News Channel.

Mas maaga ngayong linggo, sinabi ni Committee on Public Accounts Chair Terry Ridon ng Bicol Saro Party-list na hindi bababa sa 215 mambabatas ang nagpahayag na ng suporta sa impeachment ng bise presidente matapos ang mga konsultasyon, kasunod ng mga bagong at mabibigat na ebidensyang iniharap sa clarificatory hearings ng Committee on Justice.

Ayon kay Benitez, mas maraming mambabatas ang sumusuporta ngayon sa impeachment matapos magsagawa ang Kamara ng mas masusi at maingat na pagsusuri sa mga reklamo at ebidensya, na aniya’y mahigpit ding sumunod sa ruling at interpretasyon ng Korte Suprema hinggil sa impeachment rules.

Aniya, iba ito sa unang impeachment bid laban kay Duterte kung saan agad na ipinadala sa Senado ang ikaapat na impeachment complaint matapos makakuha ng suporta mula sa hindi bababa sa isang-katlo ng mga miyembro ng Kamara. Noong panahong iyon, sinuportahan ng supermajority na 215 mambabatas sa 19th Congress ang impeachment ng bise presidente.

“215 the first one. But hindi dumaan kasi ng Justice committee ‘yun. It went straight to the plenary. So now, there’s been more hearings conducted and I think there’s a lot of us who think it should go to trial,” sabi ni Benitez.

Sinabi ng deputy speaker na sapat na nakahikayat ang mga ebidensyang iniharap sa impeachment proceedings upang magkaisa ang Committee on Justice sa paghanap ng probable cause at pag-apruba sa committee report para sa plenary consideration.

“Well, I think, judging from my colleagues, more and more are being convinced that the evidence are strong. And remember, it’s probable cause. It’s really not to determine whether it’s guilty or not,” aniya.

Binigyang-diin din ni Benitez na dumarami ang mga mambabatas na nababahala sa matagal nang hindi nasasagot na mga tanong hinggil sa pinagmulan at galaw ng pondo ng bise presidente, pati na rin sa umano’y discrepancies at undeclared assets sa kanyang Statements of Assets, Liabilities and Net Worth (SALNs).

“Ang daming tanong kasi that needs to be answered that was never answered. And for example, where did the money come from? Where did the money go? Why is there discrepancy or unreported SALN assets?” sabi niya.

“And that’s the reason why I think my colleagues have seen this and through the Committee of Justice prodding and finding out all of this information. Marami talaga na-convince na siguro dapat ipadala na sa Senate for trial,” dagdag niya.

Para kay Benitez, ang pinakamalakas na ebidensya laban sa bise presidente ay may kaugnayan sa umano’y nakatagong at hindi maipaliwanag na yaman na makikita sa kanyang SALNs.

Inilarawan niya ang SALN bilang “holy grail for transparency and accountability.”

Natuklasan ng Justice committee na hindi tahasang idineklara nina Duterte at ng kanyang asawa ang kanilang cash on hand at bank deposits sa loob ng anim na magkakasunod na taon simula noong 2019. Napansin din na hindi tumutugma ang SALNs ng bise presidente sa P6.77 bilyong halaga ng covered at suspicious transactions na umano’y dumaan sa kanilang mga bank account mula pa noong 2006.

Sa kabila ng mga findings na ito, wala umanong malinaw at aktibong pagsisikap upang lubusang imbestigahan ang bilyun-bilyong transaksyon o ang SALNs ng bise presidente sa mga nakaraang taon. Dahil dito, sinabi ni Benitez na magsusulong siya ng panukalang batas upang palakasin ang SALN system bilang kasangkapan sa pananagutan ng mga public official.

“So this impeachment should not be about personality, should not be about politics. It should be about governance. And I’m filing a bill to strengthen SALN, to be a basis for holding public officials accountable. If we don’t do that, people get away with it,” sabi niya.

Sinabi rin ni Benitez na sapat ang bilang ng boto upang ma-impeach ang bise presidente dahil ang suporta ay nagmumula sa iba’t ibang partido.

“Almost all parties will be voting,” sabi niya. “That’s how you get the number. You won’t be able to get that number if it’s not across multi-parties.”

Ayon naman kay Lanao del Sur Rep. Zia Alonto Adiong ng Lakas-CMD, nasa 60 sa 69 miyembro ng partido ang pabor sa impeachment, habang sinabi ni Deputy Speaker Ronaldo Puno ng National Unity Party na inaasahang nasa 30 sa 55 miyembro nila ang boboto ng “yes.” Para naman sa party-list coalition sa Kamara, sinabi ni Tingog Party-list Rep. Jude Acidre na posibleng makapagbigay sila ng 47 sa 60 boto.

Bagama’t may ilang grupo na nagsasabing may pressure umano mula sa ibang political parties upang bumoto pabor sa impeachment, itinanggi ito ni Benitez at sinabing walang nagaganap na pamimilit.

“They might make it appear that may pressure from the parties, may arm-twisting. So, hindi ganun ang nangyari. And, in fact, as I’ve said, nag-secret balloting pa nga, just to be on the safe side. And still, the majority of the members voted for the impeachment,” sabi niya.

Dagdag pa ni Benitez, hinikayat niya ang kanyang mga kasamahan na magkaroon ng malinaw na paninindigan sa impeachment at binigyang-diin na ang pag-abstain o pagliban sa plenary vote ay halos pareho lamang.

“I keep telling all my colleagues, just do what you think is right. Because at the end of the day, that’s the only thing that will count.”

Inaasahang boboto ang plenaryo sa articles of impeachment sa Mayo 11 matapos bigyan ang mga miyembro ng humigit-kumulang limang araw upang suriin ang mga dokumento at mga kalakip na ebidensya.

“There’s been enough time. There’s been based on the process and the rules. It should be ready by Monday,” dagdag niya.