ANG Police Regional Office 6 (PRO6), sa pamumuno ni Acting Regional Director PBGEN Randulf T. Tuaño, ay muling binigyang-diin ang kahalagahan ng matatag na koordinasyon sa pagitan ng Philippine National Police (PNP) at Department of Education (DepEd) matapos ang maagap na pagtugon ng mga tauhan ng Iloilo Police Provincial Office (IPPO) sa isang insidente kung saan narekober ang isang baril mula sa bag ng isang Grade 10 na mag-aaral sa loob ng isang paaralan sa Iloilo.

Batay sa ulat, agad na ipinaalam ng mga opisyal ng paaralan sa Barotac Nuevo Municipal Police Station ang pagkakadiskubre ng isang baril sa loob ng bag ng estudyante.

Kaagad namang nagtungo sa paaralan ang mga rumespondeng pulis, kung saan boluntaryong isinuko ng pamunuan ng paaralan ang isang kalibre .38 na revolver na may anim na bala para sa wastong paghawak at dokumentasyon.

Ang 15-anyos na mag-aaral, na itinuturing na child in conflict with the law (CICL), ay isinailalim sa naaangkop na child-sensitive intervention process at kalaunan ay ipinasa sa Department of Social Welfare and Development (DSWD) para sa kaukulang disposisyon.

Samantala, nananatili sa kustodiya ng Barotac Nuevo Municipal Police Station ang nakuhang kalibre .38 na revolver at anim na bala para sa tamang disposisyon, dokumentasyon, at kaukulang legal na aksyon.

Binigyang-diin ng PRO6 na ipinakikita ng insidenteng ito ang patuloy na pagtutulungan ng mga paaralan, PNP, at DepEd sa pagpapatibay ng kaligtasan sa mga campus sa pamamagitan ng maagap na pag-uulat, malapit na koordinasyon, at mabilis na pagtugon sa mga usaping may kinalaman sa seguridad. Sa ganitong sama-samang hakbang, natutugunan agad ang mga posibleng banta habang napangangalagaan ang kapakanan ng mga mag-aaral at mga guro.

Pinuri ni PBGEN Tuaño ang mga opisyal ng paaralan at mga pulis na rumesponde dahil sa kanilang maagap at responsableng pagkilos.

“Ang pinakaimportante diri amo nga nagpabilin nga luwas ang aton mga estudyante kag mga maestro. Ginapakita sang sini nga insidente nga epektibo ang maayo nga koordinasyon sang aton mga eskwelahan kag kapulisan. Kon may makita nga sitwasyon nga mahimo makaapekto sa seguridad sang aton kabataan, importante gid nga ini dayun maireport sa otoridad agud malikawan ang posible nga peligro.”

Pinaalalahanan din niya ang mga magulang at tagapag-alaga na manatiling aktibong katuwang sa paggabay sa kanilang mga anak at hinikayat ang buong komunidad na patuloy na suportahan ang mga programa para sa kaligtasan sa mga paaralan.

“Ang seguridad sang aton mga eskwelahan responsibilidad sang tanan. Paagi sa pagbinuligay sang mga ginikanan, eskwelahan, komunidad, kag aton mga law enforcement agencies, mas mapabilin naton nga luwas ang palibot nga ginatunan sang aton kabataan.”

Tiniyak ng PRO6 na patuloy itong makikipagtulungan sa DepEd, mga lokal na pamahalaan, at iba pang mga katuwang upang lalo pang mapalakas ang mga programa para sa kaligtasan sa mga paaralan sa buong Western Visayas.

Hinikayat din ng Regional Police Office ang publiko na agad ipagbigay-alam sa mga awtoridad ang anumang impormasyon na maaaring makaapekto sa kaligtasan at seguridad ng mga paaralan at komunidad upang maagapan ang mga posibleng panganib.

Ang pangyayaring ito ay sumasalamin sa patuloy na pagtupad ng PRO6 sa adhikaing “Responsive, Trusted, and Transformative Policing for a Safer Western Visayas” sa pamamagitan ng pinaigting na pagpapatupad ng batas, community-oriented policing, at mga serbisyong nakatuon sa mamamayan, alinsunod sa PNP Focus Agenda at sa bisyon ng Bagong PNP para sa Bagong Pilipinas: Serbisyong Mabilis, Tapat at Nararamdaman sa ilalim ng pamumuno ni PNP Chief, Police General Jose Melencio C. Nartatez Jr.