NANAWAGAN si Sen. Francis “Kiko” Pangilinan ng mabilis, independent at masusing imbestigasyon sa sunog sa MV June Aster na ikinasawi ng 76 katao habang 13 pa ang nawawala sa Coron, Palawan.

Hiniling ng senador na alamin ang sanhi ng sunog, posibleng pagkukulang sa kaligtasan at lahat ng dapat managot sa trahedya.

Nakiramay si Pangilinan sa mga pamilya ng mga nasawi at sa mga naghihintay pa ng balita tungkol sa kanilang mga mahal sa buhay.

Batay sa bilang ng Philippine Coast Guard, 76 ang kumpirmadong nasawi, 43 ang nailigtas at 13 ang hindi pa natutunton.

May 134 pangalan sa ticket manifest—117 pasahero at 17 tripulante.

Dalawang nakalista ang nagsabing hindi sila nakasakay, kaya 132 ang pinaniniwalaang aktuwal na lulan ng barko batay sa kasalukuyang accounting ng PCG.

Ang MV June Aster, na pinatatakbo ng Atienza Interisland Ferries Inc., ay papunta sa Coron nang sumiklab ang apoy dakong 6:45 ng gabi noong Setyembre 9.

Nagkuwento ang ilang survivor na nakarinig sila ng pagsabog bago mabilis na kumalat ang apoy at makapal na usok.

Ayon sa PCG, nakapasa ang barko sa safety inspection noong Marso 2026 at nakitang sumusunod noon sa mga kinakailangan para sa ligtas na paglalayag.

Wala pang finding na may pagkukulang sa March inspection. Gayunman, nais ni Pangilinan na suriin ang kondisyon ng barko, mga sistema laban sa sunog, life-saving equipment, emergency exits at passenger manifest.

Hiniling din niyang siyasatin ang training at naging pagtugon ng kapitan at tripulante nang sumiklab ang apoy.

“Isang chain ang kaligtasan. May pananagutan ang bawat isa,” ani Pangilinan.

Ayon kay Pangilinan, dapat matukoy ng imbestigasyon ang lahat ng pagkukulang, ang mga dapat managot at ang mga repormang kailangang ipatupad—“hindi lamang irekomenda.”

Wala pang pinal na finding laban sa operator, kapitan, tripulante o alinmang regulatory agency.