INATASAN ni Police Regional Office 11 director, Brigadier General Leon Victor Z. Rosete ang administratibong pag-alis sa tungkulin ng acting chief ng Digos City Police Station kasunod ng nagpapatuloy na imbestigasyon sa pagpatay sa isang lokal na barangay captain na nakuhanan sa Facebook Live.

“Iniutos ko ang kanyang pagsailalim sa imbestigasyon upang mabigyan daan ang isang makatarungan, patas, at walang-kinikilingang imbestigasyon kaugnay sa pagpatay kay Barangay Tres de Mayo chairman Oscar Bucol Jr.,” sinabi ng PRO11 director sa Journal Group.

Ang inalis sa tungkulin ay si Lieutenant Colonel Peter Glenn Ipong. Inatasan din ni Brig. Gen. Rosete ang Davao del Sur Provincial Police Office na pinamumunuan ni Col. Leo Ajero na pamunuan ang imbestigasyon sa karumal-dumal na krimen.

“Nais kong maging masusi at komprehensibo ang imbestigasyong ito,” aniya.

Naghain ng P2 milyon na pabuya para sa sinumang makapagbibigay ng impormasyon na magtuturo at magdadala sa pagkakakilanlan at pag-aresto sa salarin na pumatay sa kapitan ng barangay habang ito ay naka-Facebook Live.

Noong Miyerkules, pinangunahan ni Brig. Gen. Rosete ang ocular inspection sa tirahan ng biktima upang suriin ang crime scene at i-validate ang paunang mga natuklasan ng kanyang mga tauhan. Bumisita rin siya sa pinaslang na opisyal ng lokal na pamahalaan at nakipag-usap nang pribado sa pamilya ng biktima upang ipaabot ang kanyang pakikiramay at ipaalam ang resulta ng paunang imbestigasyon.

Hinikayat din niya ang lokal na komunidad na makipagtulungan sa nagpapatuloy na imbestigasyon at ang mga saksi sa krimen na lumantad at magbigay ng mga pahayag na makatutulong sa pagtukoy sa salarin.

Binaril ang biktima noong Martes ng gabi habang siya ay naka-livestream sa Facebook.

Nakilala na rin ng lokal na pulisya ang ilang “persons of interest” matapos silang mabanggit ng biktima sa mga nauna nitong social media posts.