CITY OF SAN FERNANDO, Pampanga ― Patay ang isang 26-anyos na lalaki sa insidente ng hit-and-run na kinasasangkutan ng tatlong sasakyan noong Linggo sa kahabaan ng McArthur Highway, sa tapat ng isang gasolinahan sa Barangay San Agustin dito.

Sa ulat kay Police Regional Office 3 director Brig. Gen. Ponce Rogelio Peñones Jr., kinilala ng Pampanga police ang biktima sa pamamagitan ng kanyang national ID bilang si alyas “Christian” na residente ng Brgy. Maimpis, City of San Fernando, na sakay ng isang itim na Yamaha NMAX motorcycle.

Batay sa paunang imbestigasyon, sinabi ng isang saksi sa pulisya na binabaybay ng biktima ang northbound lane habang nasa inner lane ang isang pulang Toyota Vios at isang truck na nasa middle lane.

Ayon sa pulisya, nasagi ng Vios ang likurang bahagi ng motorsiklo ng biktima, dahilan upang mawalan siya ng kontrol at tumilapon sa kalsada.

Pagkatapos nito, nasagasaan siya ng paparating na truck.

Umalis agad sa pinangyarihan ng aksidente ang parehong driver ng pulang Vios at ang truck driver.

Sinubukan pa umanong habulin ng saksi ang dalawang sasakyan at nakuha niya ang plate number ng truck bago siya bumalik sa lugar ng insidente.

Nang rumesponde ang San Fernando Rescue Unit, natagpuan nilang malubha ang mga pinsala ng biktima at idineklarang dead on the spot.

Ayon sa pulisya, nagpapatuloy ang follow-up operations at masusing imbestigasyon upang matukoy ang driver ng pulang Vios.

Humingi na rin sila ng kopya ng CCTV footage mula sa mga kalapit na establisimyento, habang nagpalabas na ng flash alarms sa mga karatig na himpilan ng pulisya para sa posibleng pagdakip sa mga tumakas na driver.