ISINUSULONG sa Senado ang Senate Bill No. 1744 (Fair Debt Collection Practices Act) na nakabinbin sa ikalawang pagbasa matapos i-sponsor sa plenaryo noong Pebrero 10.

Inihain ang panukala noong Pebrero 4 nina Sen. Sherwin Gatchalian, Robinhood Padilla, Joel Villanueva, at Francis “Kiko” Pangilinan.

Ayon kay Villanueva, layunin ng panukala na protektahan ang mga nangungutang laban sa “abusive, deceptive, and unfair debt collection practices.”

Binibigyang diin sa panukalang batas na dapat pa ring tuparin ang lehitimong obligasyong pinansyal. Binanggit niya ang mga reklamo kaugnay ng umano’y pangha-harass, pagbabanta, at mapanlinlang na taktika ng ilang maniningil.

Matagal nang isinusulong ni Gatchalian ang katulad na reporma sa mga nakaraang Kongreso.

Kabilang sa nilalayon ng panukala ang pagbabawal sa pananakot, pangha-harass, maling representasyon, pagbabanta, at hindi awtorisadong pagbubunyag ng personal na impormasyon sa paniningil ng utang.

Tinutukoy rin nito kung sino ang maaaring ituring na debt collector at inililista ang mga ipinagbabawal na gawain.

Binigyang-diin ni Sen. Jinggoy Estrada ang pangangailangang wakasan ang “harassment, threats, public shaming, and other notorious acts bordering on criminal behavior,” lalo na sa mga kasong may kinalaman sa online lending applications.

Hindi dapat isakripisyo ang dignidad, privacy, at due process kapalit ng access sa pautang, ayon kay Sen. Estrada.

Kasabay nito, nagpatuloy ang pagpapatupad ng mga regulator laban sa abusadong paniningil.

Kamakailan ay nagpataw ng multa ang Securities and Exchange Commission sa isang financing company dahil sa unfair at abusive debt collection practices, bagay na pinalalakas umano ang panawagan para sa mas malinaw na batas.

Ang mga umiiral na proteksyon ay matatagpuan sa Financial Consumer Protection Act at sa mga regulasyong inilalabas ng SEC at Bangko Sentral ng Pilipinas. Ayon sa mga mambabatas, kailangan ang isang hiwalay at komprehensibong batas upang matugunan ang mga kakulangan sa pagpapatupad, lalo na sa pagdami ng digital lending platforms.