Sa Santiago Bay, San Fracisco, Camotes

TINATAYANG nasa 10,000 participants mula sa Cebu City ang lumahok sa ikinasang “friendship ride at Fun Run” na pinangunahan mismo ni House Deputy Speaker at 5th Dist. Cong. Vincent Franco “Duke” D. Frasco na ginanap sa Santiago Bay, sa Munisipalidad ng San Francisco, Camotes.

Sinabi ni Frasco na layunin ng “Friendship Ride at Fun Run” na maisulong ang sport tourism sa Cebu City partikular na sa Camotes Island kabilang na dito ang malaking kontribusyon na mai-aambag nito para sa local economy ng lalawigan.

Nabatid kay Frasco na naging bahagi din ng isinagawang programa ang pagpapa-raffle nito ng P250,000 na halaga ng cash price at iba pang premyo para mahikayat ang mga residente ng lalawigan na pumasok sa larangan ng sports.

Ayon kay Frasco, bilang kinatawan ng 5th District ng Cebu City. Tungkulin umano niya na mapangalagaan hindi lamang ang kapakan ng kaniyang mga kababayan. Bagkos, maging ang kanilang kalusugan sa pamamagitan ng paglulunsad ng mga programa at iba pang sports event na tulad nito.

“Hindi lamang ito ang mga sports program na gagawin natin dito sa Cebu City. Marami pa tayong mga programang gagawin para matulungan ang ating mga kababayan na lumahok sa mga sports event na tulad nito,” ayon kay Frasco.