BINUKSAN ng Department of Migrant Workers (DMW) ang mga bagong pasilidad at pagdaragdag ng medical equipment para sa overseas Filipino workers noong Setyembre 30 sa San Fernando, Pampanga na pinangunahan ni DMW Secretary Hans Leo J. Cacdac.

Pinasinayaan ang Tuberculosis Clinic, Animal Bite Center, expanded Radiology Department at ng Magnetic Resonance Imaging (MRI), mammography at CT scan machines.

Mula sa dating infirmary, isa nang Level 2 hospital ang OFW Hospital na may mahigit 72 beds para sa mga OFW na nangangailangan ng inpatient care.

Noong 2025, umabot sa 154,000 OFWs at kanilang dependents ang napagsilbihan ng ospital. Bukod sa MRI, mammography at CT scan, mayroon ding ultrasound, X-ray at fluoroscopy ang ospital.

Ayon kay Secretary Cacdac, “our growing pains are over” habang lumalawak ang kapasidad ng ospital.

“We are shifting our health framework from reactive care to proactive protection. A healthy OFW begins with strong preventive care and extends to comprehensive medical support for their families,” pahayag ni Secretary Cacdac.

Alinsunod sa derektiba ni Pangulong Ferdinand R. Marcos Jr., patuloy na nagbibigay ang OFW Hospital ng zero-billing services para sa mga kwalipikadong OFWs at kanilang dependents.

Kasama ni Secretary Cacdac sa aktibidad sina Undersecretary Dominique Rubia-Tutay, Miss Universe Philippines Bea Milan-Windorski, OFW Hospital Medical Center Chief Dr. Servando Sergio DC. Simangan., at dating OFW Partylist representative Marissa del Mar Magsino.