NADAKIP ng pulisya ang umano’y lider ng sindikatong sangkot sa iba’t-ibang uri ng krimen sa southern area ng Metro Manila matapos bumisita sa kanyang tirahan Sabado ng hapon sa Paranaque City.

Kaagad pinosasan ng mga tauhan ni Southern Police District (SPD) Director P/BGen. Glenn Oliver Cinco si alyas “Ranille”, 42, umano’y lider ng “Ranille Criminal Group” at kabilang sa Most Wanted Person sa Paranaque matapos matunton sa kanyang tinutuluyan sa Brgy. San Antonio alas-5:00 ng hapon.

Ayon kay Paranaque police chief P/Col. Nicolas Salazar, isinilbi nila sa akusado ang warrant of arrest na inilabas ni Paranaque Regional Trial Court (RTC) Presiding Judge Regina Paz A. Ramos-Chavez ng Branch 274 para sa kasong paglabag sa Comprehensive Firearms and Ammunition Regulation Act na may inilaang piyansang P120,000.

“The Southern Police District commends the swift coordination and operational excellence of the Parañaque Police Station in removing a prominent threat from the community, reinforcing the Philippine National Police’s commitment to sustained anti-criminality campaigns across Metro Manila, pahayag ni BGen. Cinco.

Nakapiit pansamantala ang akusado sa Paranaque Police Station habang hinihintay ang utos ng korte para sa paglilipat sa kanya sa Paranaque City Jail.